Simply Red - Fairground

KAMAR TUJUH R.S.U. GARUT

Aya nu ngaguguyah tengah peuting
Kuring lilir - tapi weleh taya nu ngajirim
Sada aya sora-sora palebah kamar mati
Saperti lengkah-lengkah nu rek nyabut pati

Angen ratug tutunggulan
Boa ayeuna kudu ngucapkeun : Pileuleuyan

Najan diri geus pasarah, sirna sakumna nu dipimelang
Najan panto hate geus dipeundeutkeun tina sagala katineung

Bet aya kapanasaran tinggaleun
Can ngabakti ka Nu Hiji
Nu remen disapirakeun

Ya Rabbi
Rumasa diri tambelar
Sok ngumbar kahayang sasar

Aya nu ngaguguyah waktu langit bray-brayan
Kuring lilir - tapi tetela aya jirim
(dibaju bodas dikukudung bodas)
bari uluk salam : Wilujeng Enjing !


Hikmat Sadkar
Garut, 1975.
Direvisi 1987

TANAH SUNDA ‘78

Kawih tingtrim nu kamari
Suling jeung jentreng kacapi
Haleuang pakusarakan galindeng bujang jeung lanjang
Kiwari geus ilang musna
Geus sirna tilem ku mangsa

Guruminda Sangkuriang geus jauh ti kacapangan
Pohaci jeung widadari lir impian nu geus bari

Aheng keneh dongeng sabrang
Datang ti peuntas lautan

Deudeuh tanah gumelar
Ti taun ka taun kalantar


Hikmat Sadkar
Garut, 1978.


*tina kumpulan sajak pun bapa suwargi..Srangenge Sore